कस्को घरमा छिरेपछि हावा अछुत हुन्छ ?
कस्को खेतमा पसेपछि पानी अपवित्र हुन्छ ?
भन्नूस् न बा !
सबभन्दा पहिला
आगो निकाल्नेको जात के थियो ?
बाहुन भनुँ शूद्रले सराप्छन्
शूद्र भनुँ वैश्यले हेप्छन्
वैश्य भनुँ क्षत्रीले होच्याउँछन्
क्षत्री भनुँ बाहुनले थिच्छन्
दाउ हेरिरहेजस्ता लाग्छन् सबै
निहुँ खोजिरहेझैँ लाग्छन् सबैसबै
यिनै चराचुरुङ्गीको स्वर मिसिएपछि
आमाको गाली स्वादिलो लाग्छ
यिनीहरू कुन जातका हुन् ?
झार जिलाउँदै छरेको अन्न टुसाउँदा
बुझ्छु बाको थप्पडको अर्थ
यी बिरुवाहरू कुन धर्मका हुन् ?
गाउँ छोएर बग्ने कलकल नदी
कुन राजनीतिको हो ?
मरेपछि सबैसबै माटो हुनेभए
कुन रङको माटोमा मैले टेक्नुनहुने हो ?
भन्नूस् न आमा !
कुन जातको बनेपछि मैले
कुनै जातको हुनुपर्दैन ?
कुन धर्मको बनेपछि मैले
कुनै धर्मको हुनुपर्दैन ?
कुन पार्टीको बनेपछि मैले
कुनै राजनीतिको हुनुपर्दैन ?
हिमाल,
पहाड,
तराईबाहेक
कुन ठाउँमा जन्मिएको भए
म यो देशको हुनेथिएँ ?