अस्तिको ल्होछारमा
मेरो हातमा
पुर्ख्यौली डम्फु थमाउँदै आप्थेबाले भन्नुभो
थेबा, यो डम्फु अब तिम्रो भो
हो, आप्थेबा
अब यो डम्फु
मेरो जिम्मा भो
अर्को थेबालाई नसुम्पेसम्म
मर्न दिने छैन म
यो
डम्फुले बोकेको काइतेन (इतिहास)
उम्लिरहेको छ अझै
यावेङखोलामा बगेको उर्गेनको रगत
दुखिरहेछ अझै
भिमफेदिको उकालोमा
चारपाङ्ग्रे बोक्दा खसेको
मेरा भरिया आख्खेका काँधहरू
चर्याइरहेको छ अझै
श्री ३ र ५ का खोपीहरूमा कुमारित्व लुटिँदा च्यातिएका
फुर्साङहरूका आला घाउहररू
मेरा आख्खेका खोसिएका रहरहरू
लुटिएका खुशीहरु
चुँढिएका बैँसहरु
अपहरित राज्यहरु
असरल्ल छरिएका रगतका फाल्साहरु
सकुशल फिर्क्याउनु छ मलाई
मेरो डम्फुको घेरामा ठोकिएको
बत्तीस किलाहरु
त्यसमाथी नाच्ने फुर्फुरी चरी
मलाई मेरो गुमेको इतिहाँस सम्झाई राख्नेछ
म लडिरहने छु
पुर्खाले साँचेको सपनाहरु बिउँताउन
गाउनु छ मलाई ताम्बाको काइरन
सुनाउनु छ मलाई डम्फुले बोकेको रक्तिम कथा
बन्नु छ मलाई डम्फुरे
बिउँझाउनु छ गाउँ—बेँसी
गाउनुछ अन्तिम
छोर्वाला काई (जागरणको गीत) !
२०७०-१०-२५ (याम्बु)
शब्दार्थ : तामाङ-नेपाली
आप्थेबा : जेठा बा
काइतेन : इतिहास
आख्खे : पुर्खा र जुजुबाजे
ताम्बा : तामाङ समुदायमा गीतकै माध्यमबाट इतिहास, ऐतिहासिक कथा
एवम् रितिरिवाज भन्ने व्यक्ति र इतिहासकार
काइरन : कथन र वाचन
यावेङखोला : तमाङ इतिहास अनुसार तमाङ जातिका राजा उर्गेनलाई
षड्यन्त्रमुलक ढंगले फसाएर बध गरेर फालेको खोला जुन नुवाकोट जिल्लामा
पर्दछ । र यो खोलाको पानी आजसम्म पनि तमाङहरुले पिउँदैनन् ।