मुख्य पृष्ठ » कविता » ‘बा’को इमेल

‘बा’को इमेल

string(43) "user_uploads/members/955666148136_large.jpg"
लेखक
निष्प्रभ सजी
नाम : निष्प्रभ सजी
ठेगाना : हेमजा, कास्की (हाल सिड्नी अष्ट्रेलिया
ईमेल : nisprabhsaji@gmail.com
  निष्प्रभ सजी का रचनाहरू

बाबु आजकल
अलिअलि टाइप गर्न सक्ने भएको छु
आँखा भने कमजोर हुँदैछन्
शमशेर डाक्टर, यो उमेरमा अपरेशन गर्न मिल्दैन भन्छन्
थाहा छैन यो आँखाले कहिले सम्म हरियो चिन्ला ?
बाबु यो उमेरमा भएपनि
तिमीलाई इमेल गर्न सक्ने भएको छु ।

हिजो तिमीसँग स्काइपमा कुरा गरेपछि
आमा रातभरी रोई
दिदीहरू महेन्द्रनगर छन्
दाई देहरादुन छ
तिमी तेता छौ
हामीलाई हरेक दिन अनुहार देखाउने
यही कास्कीकोट र सराङ्कोटको डाँडो छ
शमशेर डाक्टर भन्दैथिए
आमाको दुख अब निक्लियो
घुँडाको जोर्नी राम्रो सँग घुम्दैन  
आमा हिँड्नै नपाई दुख्छ भन्छे ।
परार सम्म
खरबारी बाट चुली लगाएर
घाँसको भारी बोक्ने आमालाई
आफ्नै रित्तो शरीर भारी भएको छ ।
शमशेर डाक्टर, यो उमेरमा दुःख नगर्नुस् भन्छन्
शमशेर डाक्टर, यो उमेरमा अपरेशन गर्न मिल्दैन भन्छन्

जताततै दुख्न थालेपछि
दुख खोज्न
मेला जान नपर्ने रहेछ !

मलाई थाहा छ तिमीले बिर्सिका छैनो
तिमी सानो छँदा चंगा उडाउन सिकाएको थिएँ मैले
र भनेको थिएँ
चंगा चुँडिएर रुखमै अड्कियो भने नरुनु भनेर
बाबु
चंगा चुँडिदा त मैले नया चंगा किनेर दिन्थेँ तिमीलाई
अहिले त तिमीहरुनै चंगा भएर उड्यौ
र अड्कियौ नझर्ने गरी
अहिले त तिमीहरु नै चरा भएर उड्यौ
र बनायौ नया गुँड सपनाको निलो आकाशमा !

घरको दलिनमा गौँथलीले गुँड बनाएको छ
केटाकेटीहरु अझै पनि चंगा जुधाउँदै हिँड्छन्

यतिमात्र सोच्छु
तिमी उड्ने सपनाको आकाश पनि
यहीँ कतै भईदिएको भए !

हेमजा, कास्की  (हाल सिड्नी अष्ट्रेलिया)

सन्दर्भः बा को मुख हेर्ने दिन (कुशे औँसी—२०७०)

पाठकको प्रतिक्रिया
Books on Market

अक्षर अक्षरमा देश

रचनाकार : दीपक समीप

प्रकाशक : बी एन पुस्तक संसा ...

बितरक : मुक्तक

पूरा पदनुस

रचनाकार : असीम सागर

प्रकाशक : फाइन प्रिन्ट बुक ...

बितरक : कविता

पूरा पदनुस