मुख्य पृष्ठ » कविता » यौटा अमर सपनाको अघिल्तिर

यौटा अमर सपनाको अघिल्तिर

bool(false)

कुच्याउनुसम्म कुच्याइएको

थेचार्नुसम्म थेचारिएको

हेपिएको

होच्याइएको

घाँटी ङ्याँकिएको

लुछाचुँडी गरिएको

छियाछिया हुन्जेलसम्म

चिथोरिएको

यौटा अमर सपना आएर सोध्यो,

त्यो कहिले आउँछ ?

 

ऊ त्यहीँ थियो

बर्सौं लगाएर हजुरबाले बनाएको

ढुङ्गामाटोको लामो घरअघिल्तिर

सिङ्गो शताब्दी खर्चेर

बाले चर्चरी घाममा सुकाएको

काँचो इँटाको घरको आँगनमा

अथवा

मैले दशकौँ दन्दनी आगो बालेर पकाएको

रातो इँटाको घरछेउमा

ऊ त्यहीँ थियो,

त्यही प्रश्न गरिरहेको ।

 

ऊ सोधिरहेथ्यो,

किन टालिएन अझै

आन्द्रेदमाईहरूको टाउकाको टोपी ?

ल्वान्द्रेकामीहरूले

आफ्नै हतियारमा साँध

किन लगाउन पाएनन् ?

ठुल्ठूला घर बनाउने किस्नेघर्तीहरूको

छानो किन चुहिन्छ अझै ?

कैयौँका मरेका पितृलाई पिण्ड चढाउँदै हिँड्ने

हाँसेबाहुनहरूको घरमा

किन अनिकाल छ ?

 

बर्सौंदेखि

हरेक नयाँ घरअघि उभिएर

ऊ त्यही सोधिरहेको छ,

ऊ त्यहीँ छ ।

 

यतिबेला

बा,

र तरबार टेकेको हजुरबाको भित्ताको तस्बिर

नयाँ घर बनाइरहेको छोरोलाई

इतिहास सम्झाइरहेछौँ,

‘बाबु,

ती अमर सपनाहरू खतरनाक छन्,

बच्नू !’

००

पाठकको प्रतिक्रिया
Books on Market

अक्षर अक्षरमा देश

रचनाकार : दीपक समीप

प्रकाशक : बी एन पुस्तक संसा ...

बितरक : मुक्तक

पूरा पदनुस

रचनाकार : असीम सागर

प्रकाशक : फाइन प्रिन्ट बुक ...

बितरक : कविता

पूरा पदनुस