तीर्थ गुरुङ को कविता
तीर्थ गुरुङ ले
भर्खर एउटा कविता लेखेको छ
र, पट्याएर राखेको छ
आँफु पल्टिएको सिरानी मुनि !
उस्ले त्यो कविताको शिर्षक
राख्न पनि भ्याएको छैन
उस्ले त्यो कविता
उसकी मनमाया र सानी छोरीलाई
सुनाउन पनि पाएको छैन
शयद उसले त्यो कविताको शिर्षक
उस्की सानी छोरीको
मुस्कान जस्तै राख्न खोजेको होला
शायद उस्ले त्यो कविताको शिर्षक
उसकी मनमायाको
शाहस र बिश्वास जस्तै राख्न खोजेको होला !
तिर्थ गुरुङको कविताको शिर्षक
उसले राख्न खोजे जस्तै होस्
यसपाली राख्न पाएन भने पनि
आउने बर्ष
उसको कविताको शिर्षक
कदापि नबदलियोस् !
ढिलो भएर के भो र
तीर्थ गुरुङ को कविताको शिर्षक
उसले देखेको सपना जस्तै होस् !
धेरै भयो
तीर्थ गुरुङको कविता नसुनेको !
मलाई बिश्वास छ
उसले भर्खरै सिरानी मुनि
पट्याएर राखेको कविता
उ, पोहोर साल
दोहा बाट फर्किँदा
उसकी मनमायाको अनुहारमा देखिएको
चमक जस्तै उज्यालो हुनेछ !
तीर्थ गुरुङ ले
भर्खर एउटा कविता लेखेको छ
र, पट्याएर राखेको छ
आँफु पल्टिएको सिरानी मुनि !
( यतिखेर दुबै मृगौलाले काम नगरेर अस्पतालको बेडमा डायलासिस प्रक्रिया मार्फत यो डरलाग्दो समय सँग जुधिरहेका कवि तीर्थ गुरुङमा समर्पित । तीर्थ गुरुङ संरक्षण कविता आन्दोलनका एउटा प्रखर कवि हुन् । तीर्थ गुरुङ को म्रिगौला प्रत्यारोपणका लागि साताकोसाहित्यडटकमले अष्ट्रेलियाबाट केही सहयोग जुटाउने प्रयास गरिरहेको छ । हामी कविको सिघ्र स्वस्थ्यलाभको कामना गरौं ।)
© 2024 Satako Sahitya.com. Designed & Developed By Z-INDEXMEDIA