हिर्काउनुअघि उसले राख्यो यस्तो बुँदा पनि
एक थोपो आँसु झार्न पाइने छैन रुँदा पनि

परदेश छु भन्छौ , पीडाका कहानी सुनाउँछौ
मलाई देशमै नभए झैँ लाग्छ देशमै हुँदा पनि

न्यानो कहाँ थियो ! पोल्ने गरीको पो थियो
तिम्रो अँगालो सम्झिएँ मैले आगो छुँदा पनि

पखेटा काटिदिएको कुरा प्रकट गर्दै गरेन
ऊ बोल्यो-केही चरा उड्दैनन् उडाउँदा पनि

कोही मायाको धारो निरन्तर खसाइदिइरहोस्
जिन्दगीको घैला पूरै रित्तो नहोस् चुहुँदा पनि