ऊ केही भनिरहेछ, मन्दिरको पत्थरलाई ।
मूर्ति बोल्दैन भन्ने थाहा, भएछ शहरलाई ।

तिमी आँखैले मेरो, शरीरको बलात्कार गर्छौ,
म कसरी सजाय दिऊँ, तिम्रा ती नजरलाई ?

बगिरहेको पानीको गन्तव्य, कहाँ हो भनेर,
नदीले सोधी रहेछ, किनार र बगरलाई ।

म कक्षा कोठाहरूमा, सपना बुनिरहेको छु,
लिलामीमा राखेर, त्यो छानो चुहिने घरलाई ।

पक्कै पनि झुट पढ्न, मन लागेर हुनुपर्छ,
घन्टौं देखि हेर्दैछ उस्ले, प्रेमिकाका अक्षरलाई ।