लेखक

विश्व गुरुङ

नाम : विश्व गुरुङ   विश्व गुरुङका रचनाहरू

के हाल भयो के हाल भयो आज यहाँ के हाल भयो । 
सानो सुन्दर घर मेरो चर्किएर बेहाल भयो ।। 

कुन्नि कसको आँखा लाग्यो कुन्नि कसको श्राप पर्‍यो । 
हराभरा बगैंचा यो मरुभूमी बन्दै गयो ।। 
बिगार्ने र भत्काउने नै आज मालामाल भयो । 
सानो सुन्दर घर मेरो चर्किएर बेहाल भयो ।।

जसले पनि जित्ने भन्छन् जसले पनि लुट्ने भन्छन् । 
आफ्नै दाजुभाइ मारि जो नि माथि पुग्ने भन्छन् ।। 
मन्दिर जस्तो ठाउँ आज जुवाडेको खाल भयो । 
सानो सुन्दर घर मेरो चर्किएर बेहाल भयो ।।

कति अल्झुँ जालै-जालमा कति हाँसु आशै-आशमा । 
आफ्नै घरभित्र सधैं कति बाँचु त्रासै-त्रासमा ।। 
यो मन दुख्न थालेको नि आज धेरै साल भयो । 
सानो सुन्दर घर मेरो चर्किएर बेहाल भयो ।।