लेखक

बसन्त गौतम

नाम : बसन्त गौतम   बसन्त गौतमका रचनाहरू

कुट्यो भन्नुहुन्न, सम्बन्ध बिग्रन्छ
‘हामी राजीखुशीले कुटिएका हौं! भन्नुपर्छ
लुट्यो भन्नुहुन्न, सम्बन्ध बिग्रन्छ
‘हामीले राजीखुशी राजिनामा दिएका हौं! भन्नुपर्छ
उसका लागि हामीले-
‘रोटी-बेटी’को बुर्का ओढिदिईरहनुपर्छ
र उसले-
हाम्रो ढाडमा छुरा रोप्न पाईरहनुपर्छ
उसले ढाडमा छुरी रोपेको बेला-
हामीले ‘ऐया!’ भन्नुहुन्न, सम्बन्ध बिग्रन्छ
‘छुरा किन रोपिस्?’ भन्नुहुन्न, सम्बन्ध बिग्रन्छ
‘मेरो ढाड आफैं छुरा खोज्दै गएको हो।‘ भन्नुपर्छ
ढाडबाट भुल्भुली निस्केको- रगत होईन भन्नुपर्छ
त्यो उसको ‘महान मित्रता’को निशानी हो भन्नुपर्छ

हाम्रो आँगनमा उसले बुट बजारे ताली बजाउनुपर्छ
हाम्रो मझेरीमा उसले खुट्टा पसारे रमाईदिनुपर्छ
रमाउन मन नलागे आँखा चिम्लिनुपर्छ
उसको हात चिलाए हामीले गाला थापिदिनुपर्छ
उसको हात अझै चिलाए अर्को गाला थापिदिनुपर्छ
यसरी हामीले-
गालापछि गाला थापिदिईरहनुपर्छ

नदी दिनुपर्छ, पानी दिनुपर्छ
पहाड दिनुपर्छ, ढुंगा दिनुपर्छ
‘बगेर पनि उतै जाने त हो नि!’ भन्नुपर्छ
उस्का लागि हामी भेलमा बगिदिनुपर्छ
उस्का लागि हामी बाढीमा डुबिदिनुपर्छ
तर गुनासो गर्नुहुँदैन, सम्बन्ध बिग्रन्छ
यौवन दिनुपर्छ, जीवन दिनुपर्छ
ठाऊँ-ठाऊँमा उसको जयगान गर्दिनुपर्छ
खटाई-खटाई सास फेर्नुपर्छ
लुकेर सुस्केरा हाल्नुपर्छ

तर हामीले चित्त दुखाउनु हुँदैन
हामी चित्त नभएका ढुंगा-मूढा बनीदिनुपर्छ
हामीले चित्त दुखाए उसलाई रिस उठ्छ
यसैले चित्त दुखाउनु हुँदैन, सम्बन्ध बिग्रन्छ
हामीले लामो सास ताने उसलाई झर्को लाग्छ
यसैले लामो सास तान्नुहुन्न, सम्बन्ध बिग्रन्छ

नाकाबन्दी गर्यो भन्नुहुन्न
नाकाबन्दी शब्दै निकाल्नुहुन्न
नाकाबन्दी भन्नुहुन्न, सम्बन्ध बिग्रन्छ
‘हामी आफैंले आफूलाई थुनेका हौं!’ भन्नुपर्छ
‘सम्बन्ध ‘असहज’ भयो!’ सम्म भन्न पाईन्छ
त्यो पनि ‘असहज’ मानी-मानी भन्न पाईन्छ
टाउको झुकाई-झुकाई मात्र भन्न पाईन्छ
हामीले-
‘हामी नै खत्तम, ऊ त महान!’ भनीरहनुपर्छ
‘गल्ती भयो! माफ पाऊँ!’ भन्दै उठबस गरीरहनुपर्छ
ऊ बाहेक कसैसंग नबोल्ने कसम खाईरहनुपर्छ
उठबस गरीरहनुपर्छ
कसम खाईरहनुपर्छ

‘ऐया!’ भन्नुहुन्न, सम्बन्ध बिग्रन्छ
‘छुराले किन रोपिस्?’ भन्नुहुन्न, सम्बन्ध बिग्रन्छ
चित्त दुखाउनु हुँदैन, सम्बन्ध बिग्रन्छ
लामो सास तान्नुहुन्न, सम्बन्ध बिग्रन्छ
नाकाबन्दी भन्नुहुन्न, सम्बन्ध बिग्रन्छ
नाकाबन्दी भन्नुहुन्न, सम्बन्ध बिग्रन्छ ।