सहरको भीडमा मलाई
जन्ती र मलामी उस्तैउस्तै लाग्छ

जन्ती र मलामी हिँड्ने बाटो एउटै छ
मन्दिर र घाट सँगसँगै छन्
मानिस र मृत्यु सँगसँगै छन्
एउटा पहाडी थुुम्कोमा बसेर हेर्छु आर्यघाटतिर
लाखबत्ती र लासको धुवाँ उस्तैउस्तै लाग्छ
महाराज र भिखारीको ओछ्यान फरकफरक भए पनि
चिता त उस्तैउस्तै लाग्छ

सहरको भीडमा मलाई
बगरे र जल्लाद उस्तैउस्तै लाग्छ
जन्ती र मलामी उस्तैउस्तै लाग्छ

(विशेष साहित्य :लेखकले सेतो धर्तीका लागि मदन पुरस्कार प्राप्त गरेका थिए ।)