मलाई
तिमीमाथि त्यति भरोसा छ
जति भरोसा
तानले हतासोको गर्दछ
जति
फाली, कोदालीहरूले गर्दछन्–आरनको
जति
घरलाई आँगनले
र, दलिनलाई–बास बसेका पन्छीहरूले गर्दछन्
भरोसा गर भन
म आगोको पनि भरोसा गर्न सक्छु
भरोसा गर भन
म हतियारको पनि भरोसा गर्न सक्छु
भरोसा गर भन
म बन्दुकको पनि भरोसा गर्न सक्छु
बिन्ती !
म त्यो मान्छेको भरोसा गर्न सक्दिन
जो केटाकेटीहरूको झोलामा बारुद राखिदिन्छ
यहाँ भरोसा त
डोकोले–थाप्लो र नाम्लोको गर्दछ
यहाँ भरोसा त
रित्ता पैतालाहरूले गर्दछन्
उकाली, ओरालीहरूको
यहाँ भरोसा त
चौतारीले बतासको गर्दछ
धर्तीको निगरानीमा
यहाँ ननिदाइ बस्छ–आकाश
तिमी
भरोसाको कुरा गछ्र्यौ
भरोसा छ र त
जति बगाए पनि बाढीले
गरामा बयली खेलिदिन्छन्–बालाहरू
भरोसा छ र त
गरिरहन्छु–
म तिमीसँग देशका कुराहरू
भरोसा नहुँदो हो त
म उहिल्यै आत्महत्या गरिसक्थेँ ।